Llais dylanwadol yn y sîn gerddoriaeth yn denu’r genhedlaeth nesaf o sgwennwyr sy’n trafod tiwns

Cyn-olygydd Y Selar, Gwilym Dwyfor, sy’n dod i’r Bala i gynnal gweithdy i ffans cerddoriaeth

Ddechrau’r flwyddyn newydd fe fydd cyfle i ffans cerddoriaeth ymuno â Gwilym Dwyfor mewn gweithdy ar sgwennu adolygiadau.

Mae Gwilym Dwyfor yn ffigwr amlwg yn y sîn gerddoriaeth Gymraeg, yn enwedig diolch i’w waith fel cyn-olygydd y cylchgrawn cerddoriaeth Cymraeg poblogaidd, Y Selar.

Mae’r cylchgrawn, a gafodd ei sefydlu i hyrwyddo cerddoriaeth Gymraeg ac annog trafodaeth am artistiaid a’r sîn, wedi chwarae rhan allweddol yn natblygiad nifer o gerddorion talentog.

Wrth y llyw, defnyddiodd Gwilym ei angerdd am gerddoriaeth a’i sgiliau golygyddol i roi llwyfan i lu o artistiaid a sicrhau bod cerddoriaeth Gymraeg yn cael y sylw haeddiannol.

Ei gariad at gerddoriaeth

Yn wreiddiol o Ddyffryn Nantlle, mae Gwilym yn adnabyddus am ei wybodaeth eang am gerddoriaeth ac am ei allu i ysgrifennu’n huawdl am y pynciau sy’n bwysig i’r diwydiant.

Bu’n rhan o sawl prosiect cerddorol, nid yn unig fel golygydd ond hefyd fel hyrwyddwr a beirniad cerddorol. Trwy ei waith gyda Y Selar, mae Gwilym wedi annog trafodaeth fanwl am gynrychiolaeth genedlaethol mewn cerddoriaeth, gwerthfawrogi genres llai poblogaidd, a datblygu’r sîn annibynnol yng Nghymru.

Fel golygydd, roedd Gwilym bob amser yn creu cynnwys a oedd yn herio’r status quo, a rhoddodd lais i bobol ifanc sy’n angerddol am gerddoriaeth Gymraeg.

Gweithdy Trafod Tiwns

Y gweithdy arbennig yma ydy’r cam diweddaraf i Gwilym ei gymryd i roi llais i ffans cerddoriaeth.

Mae croeso i bawb sy’n hoffi trafod tiwns ymuno â Gwilym Dwyfor ar nos Lun 6 Ionawr am 7 o’r gloch, yng Nghanolfan Henblas, Y Bala.

Mae’r gweithdy’n rhad ac am ddim, ac mae angen cadw lle o flaen llaw.

https://www.eventbrite.co.uk/e/hoffi-trafod-tiwns-tickets-1115384488029?aff=oddtdtcreator