![Clwb-Golff-Bala](https://360.scdn8.secure.raxcdn.com/ased/sites/31/2024/07/Clwb-Golff-Bala-640x396.jpeg?n)
Clwb Golff y Bala
![Tri-Chopa](https://360.scdn8.secure.raxcdn.com/ased/sites/31/2024/07/Tri-Chopa-308x190.jpeg?13)
Criw Her y Tri Chopa
Ar Orffennaf yr 20fed bydd cystadleuaeth arbennig iawn yng Nghlwb Golff y Bala. Bydd diwrnod cyfan yn cael ei neilltuo i gofio Ynyr Yaxley o Langwm a gollwyd chwe blynedd yn ôl i gancr yn 30 oed.
Disgwylir tua 40 o golffwyr i gystadlu am Dlws Coffa Ynyr Yaxley trwy chwarae 18 twll ar un o gyrsiau golff harddaf Cymru. Bydd holl elw’r diwrnod yn mynd at gronfa Young Lives v Cancer. I danlinellu pwysigrwydd y gronfa bydd nyrs yn bresennol yn y gwobrwyo ar ddiwedd y dydd – geithiwr a fu’n gofalu am Ynyr yn yr hosbis a roddodd ofal iddo. Bydd siec yn cael ei chyflwyno i’r elusen yn ystod y seremoni gwobrwyo ar ddiwedd y dydd.
Dim ond un o gyfres o ddigwyddiadau i gofio am Ynyr ydi’r gystadleuaeth golff. Bu i griw o ardal Penllyn ddringo tri chopa uchaf ynysoedd Prydain ar yr 8fed o Fehefin eleni. Llynedd dringodd y criw tri chopa Cymru i godi arian at yr un achos.
Yn ôl Huw Roberts, capten Clwb Golff y Bala, –
“Braint ydi cael trefnu’r gystadleuaeth yma yn ystod fy mlwyddyn fel capten. Roedd Ynyr yn ffrind da i gymaint ohonom ni, ac er y golled, mai’n braf cael dod at ein gilydd fel hyn i gofio amdano ac i godi arian at achos mor deilwng.”
Hyd yn hyn mae’r gronfa wedi hen fynd heibio £8,000 ac yn agosáu at £9,000 – ac mae pop ceiniog yn cyfri’ – felly cliciwch yma i gyfrannu i’r achos.
Beth amdani? Os am gymryd rhan yn y gystadleuaeth am dlws Ynyr – cysylltwch â’r Clwb Golff i sicrhau eich lle ar y tî cyntaf.